Чӑваш Республикинче 2022-мӗш çула  Мухтавлӑ ентешсен çулталӑкӗ тесе  йышӑннӑ. Чӑнах та, чӑваш халӑхӗн  мухтава тивӗçлӗ пултаруллӑ  çыннисем нумай.  Çакна шута  илсе ака уйӑхӗн 12-мӗшӗнче Хирти Мӑнтӑр вӑтам шкулӗнче вӗренекен 1-3 классенче   Комсомольски районӗнчи Хирти Мӑнтӑр ялӗнче пурӑнакан,  Чӑваш Республикин писательсен Союзӗн Хисеп Хутне, Мӗнпур чӑваш халӑхӗн Эмине ячӗллӗ премине тивӗçнӗ Мария Каçалсем сӑвӑçпа тӗл пулу ирттертӗмӗр.  Ачасем сӑвӑçа ӑшшӑн кӗтсе илчӗç. Марионелла Николаевна хӑйӗн  çинчен каласа пачӗ,  сӑвӑ кӗнекисемпе паллаштарчӗ,  çӗнӗ сӑвӑсене вуласа кӑтартрӗ.  Ачасем питӗ тимлӗ итлесе ларчӗç, унтан сӑвӑçа тӗрлӗ ыйтусем пачӗç. Калаçу хӗрсех пычӗ. Ачасем «Чӑваш йӑмри» кӗнекери «Туслӑх юрри», «Анне», «Марине» сӑвӑсене пӑхмасӑр каласа пачӗç, сӑвӑсем патне тунӑ ӱкерчӗксен выставкипе паллаштарчӗç. Вӑхӑт  иртни сисӗнмерӗ те. Уйрӑлас умӗн  сӑвӑç  ачасене вӗренӱре тӑрӑшуллӑ пулма, тӑван чӗлхене юратма,  яланах тус-юлташсемпе килӗштерсе пурӑнма сунчӗ.  Марионелла Николаевна асӑнмалӑх кашнинех кӗнеке парнелерӗ. Ачасем  уншӑн питӗ савӑнчӗç. Сӑвӑçа чун-чӗререн тав турӗç.   Хирти Мӑнтӑр ялӗнче çакӑн пек пултаруллӑ та мухтава тивӗçлӗ çын пурӑннипе чӑннипех мӑнаçланнине пӗлтерчӗç.