Юбиляр çыравçăсене, чăваш космонавчĕсене халалланă презентацисен курăвĕ Хирти Мăнтăр вăтам шкулĕнче асра юлмалла иртрĕ. Вĕренекенсем Юхма Мишши, Валери Туркай, Яков Ухсай çыравçăсем, Андриян Николаев, Муса Манаров, Николай Бударин космонавтсем пурнăçĕпе ĕçĕ-хĕлĕ çинчен тунă презентацисемпе паллашрĕç. Ыйту-хуравпа ĕçлерĕç.

     Çак кунах шкул ачисен ушкăнĕ ваттисен çуртĕнче хăнара пулчĕ. Ватăсем ачасене тарават кĕтсе илчĕç. Платонова Наталья (6 класс), Сулагаева Елена (4 класс) илемлĕ сăвăсем вуларĕç. Миронова Людмила (8 класс), Гибатдинова Диана (7 класс), Васильева Арина (3 класс) çепĕç юрăсем шăрантарчĕç. Данилова Екатерина (10 класс) ĕçпе вăрçă ветеранĕсен умĕнче «Çĕнтерÿçĕсем манăçмаççĕ» презентаципе паллаштарчĕ. Вăл вырăнти материалпа усă курса кăсăклă ĕç хатĕрленĕ. Куракансем вăрçă вăхăтне, йывăр та асаплă кунсене аса илсе хурланчĕç. Ватăсем ачасене мирлĕ тÿпе, ырлăх-сывлăх халалларĕç.